大家好，我係 lulu。當你仲有心機睇小弟貼文嘅時候，你應該唔係輸好多？點解我咁講呢，正常人經過 5 月份嘅大跌市洗禮後，留得低嘅應該唔係強者，就係有啲錢嘅人。畢竟 5 月份，$恆生指數.HK跌咗 8.35%，技術性陷入咗熊市喎？其實一早已經係熊市好耐喇，所謂技術性熊市，有時真係隨口噏，後知後覺。

小弟成日叫人唔好玩港股，不過我有時都會忍唔住買番少少，都係死響貪平果度，真係所謂平嘢冇好嘢，唔到你唔信囉，你睇美股同港股嘅走勢就知，大家分道揚鑣。美國雖然好似好多壞消息，不過美股反而越升越有，至於港股就一路向下尋底，越跌越有，越嚟越平喇。

踏入 6 月份，我就美股開始有保留，始終美股己經響高位果度，怕佢要回吐嘅話，下跌幅度會好大下，其實美股都係靠幾隻大型科技股頂住，例如，$蘋果.US、$英偉達.US 及$特斯拉.US等等。不過隨住今年內美國可能出現經濟衰退，佢哋都好難獨善共身囉，加上俄烏戰事未見有解決跡象，會唔會越演越烈呢？嚟個大家都要留意一下。

相反，六月份港股有冇轉機呢？我個人真係睇唔透，不過呢，共實好多股價跌出價值囉，我雖然唔建議買入，不過如果你有閒錢，可以試下搏一搏嘅，隨時單車變摩托喎，始終港股市盈率屬於偏低，我都覺得再大跌機會有限，而且依家已經可以分段吸納，順便拉低個成本價，不過都要抱住坐艇嘅準備，我建議可以買入$騰訊控股.HK、$阿里巴巴-SW.HK及$小米集團-W.HK等等科技股，始終佢哋真係已經跌咗好多，隨時嚟個華麗轉身都唔出奇囉。至於我持倉嘅股票，大家不妨可以參考一下。

鍾意我分享嘅朋友，畀個讚我喇，以示對我嘅支持，你嘅支持會係我最大嘅動力，如果有咩可以互相交流一下嘅，請大家留言，多謝各位支持。

本文嘅數據及觀點僅供交流學習，唔構成投資邀約及建議。投資有風險，入市需謹慎！